کابل؛ افغان يارانو لوبډلې د فوټسال "الف" ليگ سياليو اتلولي وگټله
د بدني روزنې او سپورټ عمومي رياست اړوند د فوټبال فدراسیون او د فوټسال سپورټي کمېټې له لوري د فوټسال په جمنازيوم کې د کابل د شمال، ختیځ، لويديځ او سويل زونونو د ۱۸ لوبډلو ترمنځ د فوټسال "الف" ليگ سيالۍ د افغان يارانو لوبډلې په اتلولۍ پای ته ورسېدې.
د سياليو د پای په مراسمو کې د بدني روزنې او سپورټ عمومي رياست فني او مسلکي مرستيال حافط احمد جان ځدران، د فوټبال فدراسیون رييس محمد يوسف کارگر، د ننگرهار ولايت د ورزش رياست رييس عبدالسلام وزيروال، اړوندو پلاوو او د فوتسال گڼ شمېر مينوالو گډون کړی وو.
د يادو سياليو پايلوبه د شقايق او افغان يارانو لوبډلو ترمنځ ترسره شوه، چې په پايله کې افغان يارانو لوبډلې خپلې سيالې شقايق لوبډلې ته د ۲/۳ گولونو په توپير ماتې ورکړه او اتلولۍ يې خپله کړه.
د دغو سياليو غوره لوبغاړی علي اکبر حسيني، غوره گول وهونکی قدرت الله او غوره گول ساتونکی بيا احمد فرهاد ونومول شول.
دغه سيالۍ، چې يوه مياشت يې دوام وکړ، د ترسره کېدو موخه يې د فوټسال غوره ليگ سياليو لپاره د څلورو مخکښو لوبډلو ټاکنه وه.
د سياليو د پای په مراسمو کې گټونکې لوبډلې ته د اتلولۍ جام او غوره لوبغاړو ته مډالونه او چمتو شوې ډالۍ ورکړل شوې.
