چین هانګ جو؛ دوو افغان ورزشکارانو د برنزو مډالونه واخیستل او امیري کوریایي سیال مات کړ
د چین په هانګ جو کې په روانو اسیایي المپیکي سیالیو کې د ووشو دوو تنو ورزشکارانو محمد خالد هوتک، محمد نصرت حبیبي د برنزو مډالونه وګټل او افغان تکواندو کار محمد اکبر امیري په لومړنۍ لوبه کې کوریایي سیال مات کړ.
محمد خالد هوتک په دوو لومړنیو سیالیو کې قزاقستاني او هندي سیال ته ماتې ورکړې وه؛ خو درېیمه هغه یې چینایي سیال ته بایلوده. همدارنګه محمد نصرت حبیبي هم یو استراحت او دویمه لوبه کې ټایلنډي سیال ته ماتې ورکړې وه، چې په درېیمه لوبه کې یې له ایراني حریف څخه ماتې وخوړله.
د تکواندو په برخه کې محمد اکبر امیر په +۸۰ کیلو وزن کې په لومړنۍ لوبه کې پياوړي کوریایي حریف ته ماتې ورکړه؛ خو په دویمه لوبه کې یې چینایي سیال ته میدان بایلود.
بل پلو نن د هانګ جو په وخت اته بجې افغان بوکسر عبدالجبار پوپلزی له قرغیزستاني سیال سره مخ کیږي، له دې مخکې پوپلزي په لومړۍ لوبه کې بوتاني سیال ته ماتې ورکړې وه.
