پکتیکا ؛ مرکز ښرنه کې د ۱۲ لوبډلو ترمنځ د ټېپ بال کرکټ سیالۍ پای ته رسېدې
د پکتیکا ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د یاد ولایت مرکز ښرنې خانۍ کلا سیمه کې د هېواد د ۱۰۵مې کلیزې په ویاړ د ۱۲ لوبډلو ترمنځ د ټېپ بال کرکټ سیالۍ د مددخېلو لوبډلې په اتلولي پای ته ورسېدې.
د یادو سیالیو پای لوبه د مددخېلو او ګل محمد لوبډلو ترمنځ ترسره شوه. ګل محمد لوبډلې د لوبې د پچې په ګټلو سره لومړی توپ وهنه وکړه او په ټاکلو اتو اورونو کې یې د شپږو لوبغاړو په له لاسه ورکولو سره خپلې سیالې لوبډلې ته د ۷۲ منډو هدف وټاکه. مددخېلو لوبډلې یاد هدف د خپلو څلورو لوبغاړو په له لاسه وروکولو سره د لوبې په اووم اور کې ترلاسه کړ او خپلې سیالې لوبډلې ته د شپږو ویکتو په توپیر ماتې ورکړه او اتلولي یې په خپل نوم کړه.
دغه سیالۍ د هېواد د ۱۰۵مې کلیزې د نمانځلو په موخه ترسره شوې، چې ۱۴ ورځې یې دوام وکړ او په پای کې اتلې لوبډلې ته چمتو شوې ډالۍ ورکړل شوې.
