پکتیکا؛ په سروبي ولسوالۍ کې د «سټار» په نوم د ټېپ بال کرکټ سیالۍ د ګوهر لوبډلې وګټلې
د پکتیکا ولایت د ورزش امریت، ټېپ بال فدراسیون او د سروبي ولسوالۍ د ځوانانو په ګډه همغږۍ د ۳۵لوبډلو ترمنځ د «سټار» په نوم د ټېپ بال کرکټ ټورنمنټ د ګوهر لوبډلې په بریا پای ته ورسېد.
د دغو سیالیو پایلوبې ته د ګوهر او عالم لوبډلې لار وموندله، چې د ګوهر لوبډلې لومړی توپوهنه وکړه او په ټاکلو ۱۴ اورونو کې یې ۱۳۵ مڼدې وکړې، په مقابل کې عالم لوبډلې ورکړل شوی هدف پوره نکړ.
په پای کې ګټونګې لوبډلې ته یو عراده موټر سایکل په جایزه کې ورکړل شو.
