پکتیکا؛ مټاخان ولسوالۍ کې د اتو لوبډلو ترمنځ د ټېپ بال کرېکټ سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په مټاخان ولسوالۍ کې د اتو لوبډلو ترمنځ د ټېپ بال کرېکټ سیالۍ د بلال احمد لوبډلې په اتلولي پای ته ورسېدې.
د یادو سیالیو پایلوبه د محمد یاسر او بلال احمد لوبډلو ترمنځ ترسره شوه. د لوبې پچه بلال احمد لوبډلې وګټله او لومړی یې توپ وهنه وکړه، چې په ټاکلو درېیوو اورونو کې یې د دوو ویکټو په زیان خپلې سیالې لوبډلې ته د ٥٨ منډو هدف وټاکه. محمد یاسر لوبډلې د هدف په تعقیب کې د درېیوو ویکټو په زیان ٤٠ منډې وکړې او د ١٧ منډو په توپیر یې لوبه وبایلله.
دا سیالۍ له نشه يي توکو سره د مبارزې په موخه ترسره شوې، چې دوې میاشتې یې دوام وکړ.
