پکتیکا؛ مرکز ښرنه کې د رسنیو ترمنځ د ټېپ بال کرېکټ درېیم پړاو سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي او د ځوانانو چارو د مدیریت له لوري د یاد ولایت مرکز ښرنې ښار کې د پنځو لوبډلو ترمنځ د رسنیو جام په نوم د ټېپ بال کرېکټ درېیم پړاو سیالۍ د اطلاعاتو او کلتور لوبډلې په اتلولي پای ته ورسېدې.
په دغو سیالیو کې د پښتون غږ راډیو، ملي راډیو، تعلیم الفرقان راډیو، اطلاعات اوکلتور ریاست او مېلمه راډیو لوبډلو ګډون کړی و، چې پایلوبه یې د اطلاعاتو او کلتور او مېلمه راډيو لوبډلو ترمنځ ترسره شوه. د لوبې پچه د اطلاعاتو او کلتور لوبډلې وګټله چې لومړی یې توپ وهنه وکړه او په ټاکلو لسو اورونو کې یې د خپل یو لوبغاړي په له لاسه ورکولو سره خپلې سیالې لوبډلې ته د ۱۴۱ منډو هدف وټاکه. مېلمه راډیو لوبډلې د هدف په تعقیب کې د خپلو پنځو لوبغاړو په له لاسه ورکولو سره ۱۰۴ مندې وکړې او لوبه یې د ۳۶ منډو په توپیر وبایلله.
دغه سیالۍ د خبریالانو ترمنځ د سالمې تفرېح د برابرولو په موخه ترسره شوې، چې اته ورځې یې دوام وکړ او په پای کې غوره لوبغاړو ته چمتو شوې ډالۍ ورکړل شوې.
