پکتیا؛ مرکز ګردېز کې د ۹۰ ورزش کارانو ترمنځ د WTF تکواندو ټاکنیزې سیالۍ ترسره شوې
د پکتیا ولایت دبدني روزنې او ورزش ریاست اړوند د تکواندو فدراسیون د استازولي له لوري د یاد ولایت مرکز ګردېز ښار د پکتیا پوهنتون په ورزشي جمنازیوم کې د ۹۰ ورزش کارانو ترمنځ د WTF تکواندو ټاکنیزې سیالۍ ترسره شوې.
په دغو سیالیو کې له څلورو کلپونو څخه د نویو ځوانانو او ځوانانو په عمري کټګوریو کې ۹۰ تنو ګډون کړی و، چې په پایله کې یې میوند کلپ د ۲۷ نمرو په ترلاسه کولو سره لومړی، نوید کلپ د ۱۹ نمرو په ترلاسه کولو سره دویم او حیدري کلپ بیا د ۱۰ نمرو په ترلاسه کولو سره درېیم مقام ترلاسه کړ.
همداراز له دغو سیالیو څخه لس تنه د نویو ځوانانو او اته تنه بیا د ځوانانو له کټګوري څخه د یاد ولایت د WTF تکواندو ولایتي لوبډلې ته وټاکل شول.
د یادونې وړ ده، چې له میوند کلپ څخه نقیب جان سادات د غوره لوبغاړي او احسان الله ذهین د غوره روزونکي په توګه ونومول شول.
