پکتیا؛ مرکز ګردېز ښار کې د ۳۶ ورزشکارانو ترمنځ د سوک وهنې سیالۍ ترسره شوې
د پکتیا ولایت د بدني روزنې او ورزش ریاست اړوند د سوک وهنې فدراسیون د استازولۍ له لوري د یاد ولایت مرکز ګردېز ښار په سيارکلب کې د ۳۶ ورزشکارانو ترمنځ د رمضان جام په نوم د سوک وهنې دوستانه سیالۍ ترسره شوې.
دغه سيالۍ، د نویو ځوانانو، ځوانانو او مشرانو ورزشکارانو په عمري کټګوریو کې ترسره شوې، چې په پايله کې ۱۸ ورز شکارانو خپلو سيالانو ته په ماتې ورکولو سره برياوې خپلې کړې.
د يادو سياليو موخه د سوک وهنې ورزش ته وده ورکول و، چې يوه ورځ يې دوام وکړ او په پای کې غوره ورزشکارانو ته ستاينليکونه ورکړل شول.
