پکتیا؛ جاني خېلو ولسوالۍ کې د څلورو ولایتونو ترمنځ د والیبال سیالۍ پای ته ورسېدې
د پکتيا ولايت د بدني روزنې او ورزش ریاست اړوند د والیبال فدراسیون د استازولي له لوري د ياد ولايت په جاني خېلو ولسوالۍ کې د څلورو ولایتونو د ٧٢ لوبډلو ترمنځ د والیبال سیالۍ د جاني خېلو زلميو لوبډلې په اتلولي پای ته ورسېدې.
په دغو سیالیو کې له پکتیا، خوست، لوګر او کابل ولایتونو څخه ٧٢ لوبډلو ګډون کړی و، چې پایلوبه کې یې د جاني خېلو زلميو لوبډلې د ٣ پر ١ میدانونو په توپیر خپلې سیالې پټان لوبډلې ته ماتې ورکړه او د یادو سیالیو اتلولي یې وګټله.
يادې سیالۍ په دغې ولسوالۍ کې د والیبال د ودې او پرمختګ په موخه ترسره شوې چې یوه میاشت یې دوام وکړ او په پایله کې اتلې لوبډلې ته یو پسه او غوره ورزش کارانو ته مډالونه او ستاینلیکونه ورکړل شول.
