پکتيکا کې د ۲۱ لوبډلو ترمنځ د ټېپ بال کرېکټ سيالۍ پيل شوې
د پکتيکا ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ياد ولايت په مرکز ښرنه کې د ۲۱ لوبډلو ترمنځ د "پلتوني بند جام" په نوم د ټېپ بال کرېکټ سيالۍ پيل شوې.
د يادو سياليو لومړۍ لوبه د ريحان او پلتوني بند زمريانو لوبډلو ترمنځ وشوه، د لوبې پچه ريحان لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د څلورو لوبغاړو په سوځېدو سره خپلې سيالې لوبډلې ته د ۱۳۹ منډو هدف وټاکه، په ځواب کې پلتوني بند زمريانو لوبډلې ياد هدف په وروستي اور کې ترلاسه کړ او لوبه يې د اوو ویکټو په توپیر وگټله.
دا سيالۍ د ځوانانو لپاره د سالمې تفريح برابرولو په موخه ترسره کېږي، چې شاوخوا دوې اوونۍ به دوام وکړي.
