پکتيکا کې د اتو لوبډلو ترمنځ د فوټبال سيالۍ پای ته ورسېدې
د پکتيکا ولايت د بدني روزنې او ورزش آمريت په همغږۍ او د فوټبال فدراسيون د استازولۍ له لوري د مرکز اړوند کشيوال کلي کې د اتو لوبډلو ترمنځ د فوټبال سيالۍ د کريم الله لوبډلې په اتلولۍ پای ته ورسېدې.
د يادو سياليو پايلوبه کې کريم الله لوبډلې خپلې سيالې احمد شاه لوبډلې ته د ۳ پر ۲ گولونو په توپير ماتې ورکړه او اتلولي يې خپله کړه.
دا سيالۍ د ځوانانو لپاره د سالمې تفريح برابرولو په موخه وشوې، چې دوې ورځې يې دوام وکړ.
