پکتيکا کې د ۱۴ لوبډلو ترمنځ د فوټسال سيالۍ پيل شوې
د پکتیکا ولایت د بدني روزنې او ورزش آمريت او د فوټبال فدراسيون د استازولۍ په گډه همکارۍ د مرکز اړوند ملک ورزشي لوبغالي کې د ۱۴ لوبډلو ترمنځ د فوټسال سيالۍ پيل شوې.
د يادو سياليو په پيليزه لوبه کې افغان زلميانو لوبډلې خپلې سيالې ضياء الدين افغان لوبډلې ته د ۳ پر صفر گولونو په توپير ماتې ورکړه او بريا يې خپله کړه.
دا سيالۍ فوټسال لوبې ته د ودې ورکولو او د يادې سيمې ځوانانو لپاره د سالمې تفريح برابرولو په موخه ترسره کېږي، چې دوې اوونۍ به دوام وکړي.
