په کندهار کې د پنځو ولايتونو د ورزشکارانو ترمنځ د سوک وهنې سيالۍ پای ته ورسېدې
د کندهار ولايت د بدني روزنې او ورزش رياست اړوند د سوک وهنې فدراسيون له لوري د کندهار، هرات، هلمند، نيمروز او غزني ولايتونو د ۱۰۰ ورزشکارانو ترمنځ د سوک وهنې سيالۍ ترسره شوې.
دغه سيالۍ په داسې حال کې ترسره کېږي، چې په نږدې راتلونکې کې به د کندهار په کوربتوب د پاکستان هيواد د سوک وهنې ورزشکارانو سره د سوک وهنې سيالۍ ترسره شي.
د دغو سياليو په پايله کې هرات لومړی، کندهار دويم او غزني درېیم مقام ترلاسه کړ.
د يادونې وړ ده، چې د دغو سياليو ټوليزه موخه د يادو ولايتونو له ورزشکارانو د منتخبې لوبډلې ټاکل وو، چې په راتلونکې کې به د کندهار ولايت په کوربتوب د سوک وهنې په سياليو کې ګډون وکړي.
دغو سياليو دوه ورځ دوام وکړ او په پای کې غوره ورزشکارانو ته چمتو شوې ډالۍ ورکړل شوې.
