په کابل کې د ۲۱۰ ورزشکارانو ترمنځ د بوکسنګ ټاکنیزې سیالۍ پیل شوې

د بدني روزنې او ورزش عمومي ریاست اړوند بوکسنګ فدراسیون له لوري د یاد فدراسیون په تمریناتي کلب کې د کابل په کچه د ۷۳ کلبونو د ۲۱۰ ورزشکارانو ترمنځ د بوکسنګ ټاکنیزې سیالۍ پیل شوې.

د دغو سیالیو د پیل په مراسمو کې د یاد فدراسیون مسوولینو، ورزشکارانو او د ورزش ګڼو مینوالو ګډون کړی و.

دغه سیالۍ چې شپږ ورځې به دوام وکړي، د نویو ځوانانو کټګورۍ په نهو وزنونو کې ترسره کېږي او موخه یې د کابل په کچه د ۲۶ بهترینو او غوره ورزشکارانو ټاکل دي.