په کابل کې د ۱۵۰ ورزشکارانو ترمنځ د ای ټي ټي اې اف تي کوان-دو دولسم پړاو سیالۍ پیل شوې
د بدني روزنې او ورزش عمومي ریاست اړوند تي کوان-دو فدراسیون له لوري د یاد ریاست په ۵۰۰ کسیز جمنازیوم کې د ۱۵۰ ورزشکارانو ترمنځ د ای ټي ټي اې اف تي کوان-دو دولسم پړاو سیالۍ پیل شوې.
په همدې موخه په جوړو شوو مراسمو کې د بدني روزنې او ورزش عمومي ریاست فني او مسلکي رییس عبدالمومین راد، د المپیک ملي کمټې اجرایه رییس داد محمد پاینده اختري، د مشورتي بورډ غړو، د همدې ریاست د دعوت ارشاد ریاست استازو، د نوموړي فدراسیون استازو او ورزشکارانو ګډون کړی و.
د یادو مراسمو په پیل کې د بدني روزنې او ورزش عمومي ریاست فني او مسلکي رییس عبدالمومین راد ګډونوالو ته ښه راغلاست ووایه زیاته یې کړه: موږ په ټوله مانا هڅه کوو چې د ورزشکارانو د ستونزو د اسانتیا لپاره کار وکړو او د خپلو شته امکاناتو په واسطه یې ستونزو ته د پای ټکی کېږدو، ښاغلي راد د افغانستان اقتصادي ستونزو ته په اشارې وویل: منو چې اقتصادي ستونزو لرو؛ خو موږ بیا هم نه تسلیمېږو او په خپل قوي هوډ مبارزه کوو.
ورپسې د المپیک ملي کمېټې اجرایه رییس دادمحمد پاینده اختري خبرې وکړې او په نړیوالو سیالیو کې د افغان ورزشکارانو د لاسته راوړنو مبارکي یو ځل بیا ټولو هیوادوالو ته وړاندې کړه، ده همداراز ورزشکارانو ته هیله ورکړه، چې په راتلونکې کې به د هیواد لپاره ویاړونه راوړي او د هیواد اتلان به جوړېږي.
د یادونې وړ ده چې په دغو سیالیو کې د کابل له لسو کلبونو څخه ۱۵۰ ورزشکارانو ګډون کړی و او په پایله کې به ۱۵ ورزشکاران د کابل په کچه د ملي سیالیو لپاره غوره شي.
