په سعودي کې د مېشت افغان کډوال ورزشکارانو ترمنځ د فوټبال سیالۍ روانې دي
په سعودي عربستان هیواد کې د افغان کډوال ورزشکارانو د شپږو لوبډلو ترمنځ د دې هیواد د مدینې ښار په " کال جو سټيډيوم " کې د فوټبال سیالۍ روانې دي،چې په دې ټورنمنټ کې،چې د "افغان چمپیزن ټو " تر نامه لاندې جوړ شوی، د الملکي، الشباب، العین، النور، العمید او الحرمین لوبډلې د یو بل پر وړاندې لوبې ترسره کوي چې په هره لوبډله کې دوه غیر افغان عرب ورزشکاران هم برخه لري.
دا سیالۍ د سعودي هیواد د فوټبال فدراسیون تر څارنې لاندې ترسره کېږي، چې افغان کډوال ورزشکاران د دې لوبو مصارف په خپله او یا هم د سوداګرو له لوري ترلاسه کوي،چې د سعودي حکومت له لوري ورته هم ځینې اسانتیاوې برابرې شوي دي.
یاد کډوال لوبغاړي د افغانستان د اسلامي امارت د ورزش د ادارې له هڅونې او ملاتړ څخه د مننې ترڅنګ د لا ډېرې توجه غوښتنه کوي.
د افغانستان د اسلامي امارت د المپیک د ملي کمېټې او سپورټ اداره هم هڅه کوي،چې له هیواد څخه بهر کډوال ورزشکارانو ته د بېلابېلو لوبو زمینه برابره کړي او هڅه يې کړې چې د امکان تر حده ورسره په هره برخه کې مرسته او همکاري وکړي.
یاده دې وي چې د افغانستان د ورزش اداره په ایران هیواد کې هم د افغان کډوال ورزشکارانو د استازي له ټاکلو وروسته له هغوی سره په اړیکه کې وي او تر ممکن حده يې له هغوی سره همکاري کړې ده.
د ورزش اداره په پام کې لري چې په ټولو هیوادونو کې له افغان کډوال ورزشکارانو سره په تماس کې شي او د هغوی ستونزو ته پر وخت رسېدنه او همکاري وکړي.
