په خوست کې د پنځو لوبډلو ترمنځ د سوکيو کوشين کراټې سيالۍ ترسره شوې
د خوست ولايت د بدني روزنې او سپورټ آمريت له لوري د ياد ولايت په مرکز کې د پنځو لوبډلو د ۴۰ ورزشکارانو ترمنځ د لومړي ځل لپاره د ولايتونو په کچه د سو کيو کوشين کراټې سيالۍ ترسره شوې.
په دغو سياليو کې د کابل، ننگرهار، پروان، لوگر او کوربه خوست لوبډلو گډون کړی وو، چې په پايله کې خوست لوبډلې په ۱۴ برياوو سره لومړی، ننگرهار لوبډلې په دوو برياوو سره دويم او کابل لوبډلې د يوې بريا په ترلاسه کولو سره درېيم مقام تر لاسه کړ.
د سياليو په پای کې لومړي، دويم او درېيم مقام گټونکو لوبډلو ته کپونه او غوره لوبغاړو ته مډالونه او چمتو شوې ډالۍ ورکړل شوې.
