په خوست کې د ټېپ بال کرکټ ليګ سياليو اتلولي سيد رقيب کلب لوبډلې وګټله
د خوست ولايت د ټېپ بال کرکټ ليګ سيالو اتلولي، چې ۱۲ لوبډلو پکې ګډون کړی و د اسماعيل خېلو ولسوالۍ د سيد رقيب کلب لوبډلې په اتلولۍ پای ته ورسېد.
د دغو سياليو پايلوبې ته د سيد رقيب کلب او حاجي ولي کلب لوبډلو لار موندلې وه، په پيل کې سيد رقيب کلب لوبډلې توپوهنه وکړه او په ټاکلو لسو اورونو کې يې سيالې لوبډلې ته د اوو لوبغاړو په سوځېدو ۱۲۸ منډې هدف کېښود، بل لوري ته سياله لوبډله د ياد هدف په پوره کولو کې پاتې راغله او په اتم اور کې يې د ټولو لوبغاړو په سوځېدو يوازې ۴۱ منډې جوړې کړې او په ۸۶ منډو يې سيالي بايلوده.
دغه ليګ چې نيږدې يوه نيمه مياشت وړاندې پيل شوی، تېره ورځ پای ته ورسېد او اتلې لوبډلې ته کرولا موټر د ډالۍ په شکل ورکړل شو.
