په خدیم اف سي لوبډلې شپږ کاله لوبيز بندیز ولګېده
د افغانستان فوټبال فدراسیون د یوې اعلامې په خپرولو سره د سرپل ولایت اړوند خدیم اف سي لوبډلې باندې د افغانستان اتلانو غوره لیګ سیالیو کې شپږ کاله لوبيز بندیز ولګوه.
د فوټبال فدراسیون په اعلامیه کې راغلي چې یادې لوبډلې د افغانستان اتلانو لیګ څلورم پړاو سیالۍ چې په هرات کې ترسره شوې، په نیمايي کې پرېښودې او له سیالیو څخه یې انصراف وکړ.
د خپرې شوې اعلامیې پر بنسټ، د فوټبال فدراسیون قضايي ډیپارټمنټ د انضباطي اصولنامې د ۹مې مادې په نظر کې نیولو سره د یادې اصولنامې د پنځمې، شپږمې، ۱۶مې او ۲۶مې مادې د هدایت مطابق د سرپل ولایت اړوند خدیم اف سي فوټبال لوبډلې باندې ۲۵۰زره افغانۍ نقدي جریمه ایښې ده او همداراز یاده لوبډله نه شي کولی، چې تر راتلونکو شپږو کالونو پورې د افغانستان اتلانو لیګ کې، درې کاله د سرپل ولایت فوټبال غوره لیګ کې او دوه کاله د همدې ولایت په الف لیګ کې ګډون وکړي.
همداراز د شوې پرېکړې پر بنسټ د یادې لوبډلې مدیر جاوېد د ټول عمر لپاره د فوټبال، فوتسال او ساحلي فوټبال په برخه کې هېڅ ډول فعالیت نه شي کولی.
دا په داسې حال کې ده، چې سږکال د وزلوبې شپږم پړاو سیالیو کې هم د سرپل ولایت لوبډلې د وزلوبې فدراسیون د اصولنامې خلاف په پایلوبه کې د نه حاضرېدو له امله درې کاله د وزلوبې غوره لیګ سیالیو کې له لوبېدو څخه منع شوه.
