پروان؛ اتفاق لوبډلې د پروان پوهنتون محصلانو اتحاد جام په نوم د واليبال سياليو اتلولي خپله کړه
د پروان ولايت د بدني روزنې او ورزش آمريت اړوند د واليبال فدراسيون د استازولۍ له لوري د ياد ولايت په مرکزي جمنازيوم کې د لسو لوبډلو ترمنځ د پروان پوهنتون محصلانو اتحاد جام په نوم د واليبال سيالۍ، چې يوه اوونۍ مخکې پيل شوې وې، د اتفاق لوبډلې په اتلولۍ پای ته ورسېدې.
په دغو سياليو کې د ارغوان، دره سرخ، اتفاق، پنجشیر، بدخشان، لیلیه، فتح خیبر، اتحاد سرخ، آفتاب او روشنایي لوبډلو گډون کړی وو، چې په پايلوبه کې اتفاق لوبډلې خپلې سيالې دره سرخ لوبډلې ته د ۳ پر صفر ميدانونو په توپير ماتې ورکړه او اتلولي يې خپله کړه.
د يادونې وړ ده، چې د دغو سياليو په پای کې غوره لوبډلو او لوبغاړو ته کپونه، توپ، مډالونه، ورزشي لباسونه او ستاينليکونه ورکړل شول.
