پاکستان - تکواندو؛ افغان لوبغاړو دوه د برونزو او یو د نقرې مډال ګټلی
د پاکستان په مرکز اسلام اباد کې د شاوخوا اوولسو هېوادنو تر منځ د تکواندو لوبغاړو تر منځ په روانو سیالیو کې افغان لوبډلې تر اوسه درې مډالونه ګټلي دي.
په لومړي وزن کې محمد عاطف یعقوبي د پاکستاني سیال پر وړاندې څلور لوبې وګټلي،خو د مصري سیال پر وړاندې يې یوه وبایلله، چې په دې ډول يې درېیم مقام او د برونزو مډال وګاټه.
همدارنګه احمد جواد ځاځي له پاکستاني او عماني سیالانو نه پنځه لوبې وګټلې او د پاکستاني سیال پر وړاندې يې یوه وبایلله، چې په دې ډول يې درېیم مقام او د برونزو مډال خپل کړ.
یو بل افغان لوبغاړي حکمت الله زین بیا له پاکستاني او مصري سیالانو شپږ لوبې وګټلې، خو د کورواسي پياوړي لوبغاړي پر وړاندې يې لوبه وبایلله، چې په دې ډول يې دویم مقام او نقرهيي مډال وګاټه.
دا لوبې چې شاوخوا ۳۶ لوبډلې او ټول پکې ۴۲۰ لوبغاړي برخه لري، لا هم جریان لري.
افغان لوبغاړي به نن په دویم، پنځم او اووم وزن کې له خپلو سیالانو سره مخ شي.
