هلمند کې د نهو ولايتونو ترمنځ د غېږنیونې ټاکنيزې سيالۍ پيل شوې
د المپيک، بدني روزنې او ورزش عمومي ریاست اړوند د پهلواني ملي فدراسيون په همکارۍ او د TLO مؤسیسې په مالي ملاتړ د مرکز لښکرگاه ښار په لوبغالي کې د نهو ولايتونو د لسو لوبډلو ترمنځ د سويل لوېديځ زون لوبډلې ته د غوره غېږنیونکو ټاکلو په موخه د بست په نوم د غېږنیونې سيالۍ پيل شوې.
په يادو سياليو کې له کندهار، زابل، هرات، بادغيس، ارزگان، فراه، نيمروز، غور او هلمند الف او ب لوبډلو څخه ۱۰۰ تنو غېږنیونکو په " ۶۰، ۶۵، ۷۰، ۷۵، ۸۰، ۸۵، ۹۰، ۹۵، ۱۰۰، او ۱۰۰ + " وزني کټگوريو کې گډون کړی، چې په پايله کې به له هر وزن څخه څلور تنه غېږنیونکي د سويل لويديځ زون لوبډلې ته وټاکل شي.
د ويلو ده، چې دغه سيالۍ په کمربندي سبک کې ترسره کېږي او دوې ورځې به دوام وکړي.
