هلمند؛ گرمسېر ولسوالۍ کې د ۱۲ لوبډلو ترمنځ د فوټبال سيالۍ پای ته ورسېدې
د هلمند ولايت د بدني روزنې او ورزش آمريت اړوند د فوټبال فدراسیون د استازولۍ له لوري د گرمسېر ولسوالۍ په صفار فوټبال حوزه کې د ۱۲ لوبډلو ترمنځ د محمد صديق معراج په نوم د فوټبال گروپي سيالۍ د ستاره هلمند لوبډلې په اتلولۍ پای ته ورسېدې.
د يادو سياليو پايلوبه د ستاره هلمند او صفار لېسې لوبډلو ترمنځ ترسره شوه، چې په ټاکلي وخت سيالي ۰/۰ مساوي پای ته ورسېده، خو په پینالټيانو کې ستاره هلمند لوبډلې خپلې سيالې لوبډلې ته د ۴ پر ۳ گولونو په توپير ماتې ورکړه او اتلولي يې وگټله.
د يادولو وړ ده، چې دغو سیالیو دوې اوونۍ دوام وکړ.
