هلمند؛ واشیر ولسوالۍ کې د ١٢ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په واشیر ولسوالۍ کې د ١٢ لوبډلو ترمنځ د ټېپ بال کرېکټ سیالۍ د اریانا لوبډلې په اتلولي پای ته ورسېدې.
د یادو سیالیو پایلوبه د اریانا او وصال لوبډلو ترمنځ ترسره شوه. د لوبې پچه وصال لوبډلې وګټله او لومړی یې توپوهنه وکړه، چې په ټاکلو لسو اورونو کې یې خپلې سیالې لوبډلې ته د ١١١ منډو هدف وټاکه. اریانا لوبډلې ټاکلی هدف د یوې ویکټې په زیان د لوبې په اووم اور کې ترلاسه کړ او د نهو ویکټو په توپیر یې اتلولي وګټله.
دا سیالۍ ورزش ته د ځوانانو د هڅولو او د سالمې تفرېح برابرولو په موخه ترسره شوې، چې لس ورځې یې دوام وکړ.
