هلمند؛ ناد علي ولسوالۍ کې د ۱۲ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د یاد ولایت په ناد علي ولسوالۍ کې د ۱۲ لوبډلو ترمنځ د ټېپ بال کرېکټ سیالۍ د شفق ورونو لوبډلې په اتلولي پای ته ورسېدې.
د یادو سیالیو پایلوبه د شفق ورونو او فیض روحاني لوبډلو ترمنځ ترسره شوه. د لوبې پچه فیض روحاني لوبډلې وګټله او د توپ وهنې پرېکړه یې وکړه چې په ټاکلو لسو اورونو کې یې د خپلو ۷ لوبغاړو په له لاسه ورکولو سره خپلې سیالې لوبډلې ته د ۱۲۲ مندو هدف وټاکه. شفق ورونو لوبډلې ټاکلی هدف د لوبې په وروستي اور کې د خپلو پنځو لوبغاړو په له لاسه ورکول وسره بشپړ کړ او د پنځو ویکټو په توپیر یې خپلې سیالې لوبډلې ته په ماتې ورکولو سره د یادو سیالیو اتلولي وګټله.
دا سیالۍ د ځوانانو لپاره د سالمې تفرېح برابرولو په موخه ترسره شوې، چې درې اوونۍ یې دوام وکړ.
