هلمند؛ مسلم ازاد لوبډلې د مارجې ولسوالۍ د ټېپ کرکټ سياليو اتلولي وگټله
د هلمند ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري د مارجې ولسوالۍ په کيمف سيمه کې د اتو لوبډلو ترمنځ د ټېپ بال کرکټ سيالۍ د مسلم ازاد لوبډلې په اتلولۍ پای ته ورسېدې.
د يادو سياليو پايلوبه د مسلم ازاد او افغان لوبډلو ترمنځ ترسره شوه، چې په پايله کې مسلم ازاد لوبډلې په ټاکلو ۱۲ اورونو کې خپلې سيالې لوبډلې ته د ۱۸۲ منډو هدف کېښود، افغان لوبډلې ياد هدف تر لاسه نه کړ او د ۴۲ منډو په توپير يې ماته ومنله.
د دغو سياليو د ترسره کېدو موخه د ځوانانو يووالی و، چې شاوخوا يوه مياشت يې دوام وکړ او په پای کې لومړي او دويم مقام گټونکو لوبډلو ته کپونه او غوره لوبغاړو ته چمتو شوې ډالۍ ورکړل شوې.
