هلمند؛ مرکز لښکرګاه ښار کې د ۱۵ لوبډلو ترمنځ د ټېپ بال کرېکټ سیالۍ پیل شوې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د یاد ولایت مرکز لښکرګاه ښار اړوند د اوومې حوزې په کوچني کارېز سیمه کې د ۱۵ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د عرفان او روحاني لوبډلو ترمنځ ترسره شوه. د لوبې پچه روحاني لوبډلې وګټله او لومړی یې توپوهنه وکړه چې په ټاکلو لسو اورونو کې یې خپلې سیالې لوبډلې ته د ۱۰۹ منډو هدف وتاکه. عرفان لوبډلې هم د هدف په تعقیب کې ۱۰۸ منډې وکړې خو په سوپر اور کې بیا روحاني لوبډلې خپلې سیالې لوبډلې ته ماتې ورکړه او د سیالیو لومړۍ بریا یې په خپل نوم ثبت کړه.
دا سیالۍ د ځوانانو ترمنځ د یووالي په موخه پیل شوي دي، چې ۲۵ ورځې به دوام وکړي.
