هلمند؛ مارجې ولسوالۍ کې د ٢۴ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په مارجې ولسوالۍ کې د ۲۴ لوبډلو ترمنځ د ټېپ بال کرېکټ شپنۍ سیالۍ د خپلواک اتلانو لوبډلې په اتلولي پای ته ورسېدې.
د یادو سیالیو پایلوبه د خپلواک اتلانو او ظاهري لوبډلو ترمنځ ترسره شوه. د لوبې پچه ظاهري لوبډلې وګټله او لومړی یې توپوهنه وکړه، چې په ټاکلو لسو اورونو کې یې خپلې سیالې لوبډلې ته د ١١۶ منډو هدف وټاکه. خپلواک اتلانو لوبډلې ټاکلی هدف د شپږو ویکټو په زیان د لوبې په اووم اور کې ترلاسه کړ او د څلورو ویکټو په توپیر یې د دغو سیالیو اتلولي وګټله.
دا سیالۍ د د سیمې د ځوانانو لپاره د سالمې تفرېح برابرولو په موخه ترسره شوې، چې درې اوونۍ یې دوام وکړ او په پای کې اتلې لوبډلې ته یو عراده موټرسايکل ورکړل شو.
