هلمند؛ لښکرگاه ښار کې د ۳۶ لوبډلو ترمنځ د فوټسال سيالۍ پيل شوې
د هلمند ولايت د بدني روزنې او ورزش امريت اړوند د فوټبال فدراسيون د استازولۍ له لوري د لښکرگاه ښار په غازي محمد ايوب خان ورزشي جمنازيوم کې د ۳۶ لوبډلو ترمنځ د تگ-راتگ په شکل د فوټسال سيالۍ پيل شوې.
د يادو سياليو لومړۍ لوبه د سادات او ستورو لوبډلو ترمنځ ترسره شوه، چې په پايله کې سادات لوبډلې خپلې سيالې لوبډلې ته د ۴/۷ گولونو په توپير ماتې ورکړه او بريا يې خپله کړه.
د دغو سياليو د ترسره کېدو موخه د ځوانانو سالم مصروفیت دی، چې شاوخوا يوه مياشت به دوام وکړي.
