هلمند؛ سباوون هاشمي لوبډلې د فوټبال گروپي سيالیو اتلولي وګټله
د هلمند ولايت د بدني روزنې او سپورټ آمريت اړوند د فوټبال فدراسیون د استازولۍ له لوري د گرشک ولسوالۍ په الفتاح بُستي لېسې کې د ۱۲ لوبډلو ترمنځ د سيال په نوم د فوټبال گروپي سيالۍ د سباوون هاشمي لوبډلې په اتلولۍ پای ته ورسېدې.
د يادو سياليو پايلوبه د سباوون هاشمي او غلام رسول فضلي لوبډلو ترمنځ ترسره شوه، چې په پايله کې سباوون هاشمي لوبډلې خپلې سيالې لوبډلې ته د ۱/۳ گولونو په توپير ماتې ورکړه او بريا يې خپله کړه.
د دغو سياليو غوره گول وهونکی اصف مزاری، غوره لوبغاړی نجيب الله سالار او غوره گول ساتونکی بصير بهير ونومول شول.
دغه سيالۍ، چې يوه نيمه مياشت يې دوام وکړ، په پای کې ګټونکې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
