هلمند؛ اقصې لوبډلې د هلمند فوټسال غوره ليگ څلورم پړاو سياليو اتلولي وگټله
د هلمند ولايت د بدني روزنې او ورزش امريت اړوند د فوټبال فدراسيون د استازولۍ او د فوټسال کمېټې له لوري د هلمند ولايت په مرکزي جمنازيوم کې د لسو لوبډلو ترمنځ د هلمند فوټسال غوره ليگ سيالۍ د اقصې لوبډلې په اتلولۍ پای ته ورسېدې.
د يادو سياليو پايلوبه د اقصې او نورک لوبډلو ترمنځ ترسره شوه، چې په پايله کې اقصې لوبډلې خپلې سيالې لوبډلې ته ۰/۱ گول په توپير ماتې ورکړه او اتلولي يې خپله کړه.
د دغو سياليو غوره گول وهونکی ط ا لب، غوره گول ساتونکی معراج الدين او غوره لوبغاړی بيا جاويد احمد ونومول شو.
دغه سيالۍ، چې شاوخوا يوه مياشت يې دوام وکړ، د ترسره کېدو موخه يې ورزش ته د ځوانانو هڅول وو او په پای کې د ياد ولايت د ورزش امريت له لوري گټونکې لوبډلې ته د اتلولۍ جام او غوره لوبغاړو ته مډالونه، ستاينليکونه او چمتو شوې ډالۍ ورکړل شوې.
د يادونې وړ ده، چې په نږدې وخت کې به د ولايتونو په کچه د فوټسال سيالۍ پيل شي، چې د هلمند ولايت څخه به پکې سباوون هاشمي لوبډله گډون وکړي.
