هرات ولایت ته د بدني روزنې او ورزش عمومي ریاست د تلونکي پلاوي له لوري ښوونیز سیمینار ترسره شو
د هرات ولایت بدني روزنې او ورزش ریاست د جلساتو په سالون کې په ورزش سیالیو کې د پلان ګذاري، په اسلام کې د ورزش اصول او مقررات او زیان پېژندنې په برخو ښوونیز سمینار ترسره شو.
په دې ښوونیز سمینار کې د هرات بدني روزنې او ورزش رئیس محمد فایق فاضل، د ورزشي فدراسیونونو رئیسانو، د بېلابېلو ورزشي رشتو استادانو او روزونکو ګډون کړی و.
ښاغلي فاضل په خپلو خبرو کې د بدني روزنې او ورزش عمومي ریاست له کارکوونکو څخه د مننې ترڅنګ د ورزش د ودې او پرمختګ لپاره د دا ډول پروګرامونو پلي کول مهم وبلل په خبره یې؛ په اسلام کې د ورزش قوانینو او مقرراتو باندې پوهاوی د ورزشکارنو، استادانو او روزونکو له مهمو اړتیاوو څخه دي.
د دې ښوونیز سمینار په پای کې ګډونوالو ته د بدني روزنې او ورزش عمومي ریاست له لوري لوح تقدیر هم ورکړل شول.
