هدایت لوبډلې د بغلان د فوټبال الف لیګ سیالیو اتلولي وګټله
د بغلان ولایت د فوټبال الف لیګ سیالۍ، چې یوه میاشت وړاندې د بغلان فوټبال فدراسیون له لوري د ۲۸ لوبډلو ترمنځ پیل شوې وې، د هدایت لوبډلې په اتولۍ پای ته ورسېدې.
دغه سیالۍ، چې د بغلان زاړه ښار په جمنازیوم کې ترسره شوې وې، د پایلوبې لیدو ته یې د بغلان د ورزش ادارې او فوټبال فدراسیون مسؤولین، استادان، ورزشکاران او ګڼ شمېر لیدونکي ورغلي وو.
د سیالیو پایلوبه د هدایت او یووالي لوبډلو ترمنځ وه چې هدایت لوبډلې د ۱-۵ ګولونو په توپیر خپلې سیالې لوبډلې ته ماتې ورکړه.
په پای کې د ورزش ادارې له لوري مخکښو لوبډلو او پیاوړیو ورزشکارانو ته ډالۍ او کپونه ورکړل شول.
