نیمروز؛ پيام شهدا لوبډلې د چخانسور ولسوالۍ د فوټسال الف لوبډلو د لیګ اتلولي خپله کړه
د نیمروز ولایت د چخانسور ولسوالۍ د فوټسال د الف لوبډلو لیګ سیالۍ، چې یوه میاشت وړاندې د نیمروز د ورزش آمریت په همکارۍ د فوټبال فدراسیون له لوري د پنځو لوبډلو ترمنځ پیل شوې وې، د پیام شهدا لوبډلې په اتلولۍ سره پای ته ورسیدې.
د سیالیو د پای په مراسمو کې د ورزش مسؤولينو، د فوټبال فدراسيون استازو، د ملکي او نظامي ادارو مسوولينو او ګڼ شمېر مينوالو برخه اخيستې وه.
په پایلوبه کې پیام شهدا او شاقیس لوبډلې له یو بل سره ولوبېدې، په پایله کې پیام شهدا لوبډلې د ۱۵ امتیازونو په ګټلو سره لومړی او شاقیس لوبډلې د ۱۲ امتیازونو په ګټلو سره دویم مقام خپل کړ.
په پای کې د مسوولينو له لوري ګټونکو لوبډلو او غوره لوبغاړو ته کپونه او مډالونه ووېشل شول.
د يادونې وړ ده، چې د دغو سياليو د ترسره کېدو موخه په چخانسور ولسوالۍ کې د فوټسال وده او پراختيا وه.
