نورستان؛ وایګل ولسوالۍ کې د شپږو لوبډلو ترمنځ د والیبال سیالۍ پای ته ورسېدې
د نورستان ولایت د بدني روزنې او ورزش امریت په همکارۍ او د وایګل ولسوالۍ ورزشي مدیریت له لوري په یادې ولسوالۍ کې د وایګل نارینه لېسې د شپږو لوبډلو ترمنځ د والیبال سیالۍ د دولسم ټولګي لوبډلې په اتلولۍ پای ته ورسېدې.
د دغو سیالیو په پایلوبه کې دولسم ټولګي لوبډلې خپلې سیالې یوولسم ټولګي لوبډلې ته د ۳/۰ میدانونو په توپير ماتې ورکړه او اتلولي یې خپله کړه.
د یادو سیالیو موخه د ځوانانو ترمنځ د والیبال لوبو ته وده ورکول و، چې درې ورځې یې دوام وکړ.
د سیالیو په پای کې د وایګل ولسوالۍ ورزشي مدیریت له لوري غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
