ننگرهار ؛ سپين غر ولسوالۍ کې د لسو لوبډلو تر منځ د ټېپ بال کرکټ سيالۍ پېل شوې
د ننگرهار ولايت د بدني روزنې او سپورټ رياست اړوند د شينوارو شپږگونو ولسواليو ورزشي مديريت او د مهاجرينو رياست په مالي ملاتړ د سپين غر ولسوالۍ په سرحدي کنډک ورزشي لوبغالي کې د ۱۰ لوبډلو تر منځ كډوالو ته د هر کلي په موخه د ټېپ بال کرکټ سيالۍ پيل شوې.
د يادو سياليو لومړۍ لوبه د سپين غر او دور بابا ولسواليو لوبډلو تر منځ ترسره شوه، چې په پايله کې سپين غر لوبډلې په ټاکلو اتو اورونو کې خپلې سيالې لوبډلې ته د ۱۰۴ منډو هدف کېښود، دور بابا لوبډلې ياد هدف تر لاسه نه کړ او د ۱۴ منډو په توپير د سپين غر لوبډلې په بريا پای ته ورسېده.
د يادونې وړ ده، چې دغه سيالۍ به شاوخوا يوه اوونۍ دوام وکړي.
