ننگرهار؛ ډاکټر حبيب الله احسان د غشي ويشتلو فدراسيون د مسؤل په توگه وټاکل شو

د ننگرهار ولايت د بدني روزنې او ورزش رياست او د غشي ويشتلو ملي فدراسيون په گډه همغږۍ د يو لړ ځانگړو مراسمو په ترڅ کې ډاکټر حبيب الله احسان د ياد ولايت د غشي ويشتلو فدراسيون د مسؤل په توگه رسماً وټاکل شو.

په دغو مراسمو کې د المپيک، بدني روزنې او ورزش عمومي رياست د خدماتو چارو آمر احمد ناصر زاخيلي، د غشي ويشتلو فدراسيون رييس استاد لعل محمد سيار د ننگرهار ولايت د ورزشي چارو آمر ډاکټر منير الدين خالد، ورزشي مسؤلينو او ورزشکارانو گډون کړی وو.

په يادو مراسمو کې د غشي ويشتلو ملي فدراسيون رييس استاد لعل محمد سيار وويل: (( هڅه مو دا ده، چې د غشي ويشتلو لوبې ته وده ورکړو، تر څو په ياده لوبه کې هم په ملي او نړيواله کچه ښه لوبغاړي ولرو، ښاغلي سيار همداراز هېله څرگنده، چې په نوې ټاکنې سره به په ياد ولايت کې د غشي ويشتلو لوبه لا ښه وده او پرمختگ وکړي.))

د يادولو وړ ده، چې څو ورځې مخکې د ووشو فدراسيون لپاره مسؤل هم ټاکل شوی و.