ننگرهار؛ په بټي کوټ ولسوالۍ کې د ۳۰ لوبډلو ترمنځ د ټېپ بال کرکټ سيالۍ پيل شوې
د ننگرهار ولايت د بدني روزنې او ورزش رياست په همکارۍ د ياد ولايت په بټي کوټ ولسوالۍ کې د ۳۰ لوبډلو ترمنځ د ځوانانو د فکري رغوونې په موخه د ټېپ بال کرکټ سيالۍ، چې يوه مياشت به دوام وکړي، د پامير کېنگ لوبډلې په بريا پيل شوې.
د يادو سياليو لومړنۍ لوبه د پامير کېنگ او سوديس موډ لوبډلو ترمنځ ترسره شوه، چې سوديس موډ لوبډلې د لوبې پچې په گټلو سره په ټاکلو لسو اورونو کې د شپږو لوبغاړو په سوځېدو سره سیالې لوبډلې ته د ۱۲۲ منډو هدف وټاکه، په مقابل کې پامير کېنگ لوبډلې ياد هدف په شپږم اور کې ترلاسه کړ او لوبه يې د اتو ويکټو په توپير وگټله.
