ننگرهار؛ مارکو سټارز لوبډلې د دور بابا ولسوالۍ د ټېپ بال کرکټ سياليو اتلولي وگټله
د ننگرهار ولايت د بدني روزنې او ورزش رياست اړوند د شينوارو شپږگونو ولسواليو ورزشي مديريت په همغږۍ د دور بابا ولسوالۍ په هوسا چينې ورزشي ميدان کې د ۱۶ لوبډلو ترمنځ د ټېپ بال کرکټ سيالۍ د مارکو سټارز لوبډلې په اتلولۍ پای ته ورسېدې.
د دغو سياليو پايلوبه د مارکو سټارز او هوسا چينې لوبډلو ترمنځ ترسره شوه، هوسا چينې لوبډلې د لوبې پچې په گټلو سره په ټاکلو لسو اورونو کې د شپږو لوبغاړو په سوځېدو سره سیالې لوبډلې ته د ۱۱۴ منډو هدف کېښود، مارکو سټارز لوبډلې ياد هدف په شپږم اور کې ترلاسه کړ او د اتو ويکټو په توپير يې بريا خپله کړه.
دغه سيالۍ، چې د هېواد د بيارغونې په موخه ترسره شوې، شاوخوا دوې اوونۍ يې دوام وکړ او په پای کې اتلې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
