ننگرهار؛ لوی راغه لوبډلې د مينې او يووالي اختر په نوم د ټېپ بال کرکټ سياليو اتلولي وگټله
د ننگرهار ولایت د بدني روزنې او ورزش رياست اړوند د شينوارو شپږگونو ولسواليو ورزشي مديريت په همغږۍ د دور بابا ولسوالۍ په سرې پښتۍ لوبغالي کې د ۱۴ لوبډلو ترمنځ د مينې او يووالي اختر په نوم د ټېپ بال کرکټ سيالۍ د لوی راغه لوبډلې په اتلولۍ پای ته ورسېدې.
د دغو سياليو پايلوبه د لوی راغه او سليماني لوبډلو ترمنځ ترسره شوه، لوی راغه لوبډلې د لوبې پچې په گټلو سره په ټاکلو اتو اورونو د شپږو لوبغاړو په سوځېدو سره سیالې لوبډلې ته د ۱۰۸ منډو هدف کېښود، سليماني لوبډلې ياد هدف ترلاسه نه کړ او د درېيو منډو په توپير يې ماته ومنله.
دغه سيالۍ، چې شاوخوا دوې اوونۍ يې دوام وکړ، په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
