ننگرهار؛ شېرزاد ولسوالۍ کې د اتو لوبډلو ترمنځ د شپږیزې کرکټ ليگ پيل شو
د ننگرهار ولايت د بدني روزنې او ورزش ریاست په همکارۍ د ياد ولايت په شېرزاد ولسوالۍ کې د اتو لوبډلو ترمنځ د ځوانانو هڅولو او ورزش ته د ودې ورکولو په موخه د شپږیزې کرکټ ليگ لومړي پړاو سيالۍ پيل شوې.
د يادو سياليو لومړۍ لوبه د طوطو سده خېلو ځوانانو او پټلو سټار لوبډلو ترمنځ ترسره شوه، د لوبه پچه طوطو سده خېلو لوبډلې وگټله او لومړی یې د توپ وهنې پرېکړه وکړه، چې په ټاکلو لسو اورونو کې يې د پنځو لوبغاړو په سوځېدو سره سيالې لوبډلې ته د ۱۴۲ منډو هدف وټاکه، په مقابل کې پټلو سټار لوبډلې د اووه لوبغاړو په سوځېدو سره يوازې ۹۰ منډې وکړې او لوبه يې د ۵۲ منډو په توپير وبايلله.
د ويلو وړ ده، چې دغه سيالۍ به شاوخوا دوې اوونۍ دوام وکړي.
