ننگرهار؛ ختیځ ځوانانو لوبډلې د شينوارو ټېپ بال کرکټ غوره ليگ دويم پړاو سياليو اتلولي وگټله
د ننگرهار ولايت د بدني روزنې او ورزش رياست اړوند د شينوارو شپږگونو ولسواليو ورزشي مديريت په همغږۍ د ياد ولايت په شينوارو ولسوالۍ کې د ۱۶ لوبډلو ترمنځ د ځوانانو يووالي او د ااا له نظام څخه د ملاتړ په موخه د شينوارو ټېپ بال کرکټ غوره ليگ (SPL) دويم پړاو سيالۍ د ختيځ ځوانانو لوبډلې په اتلولۍ پای ته ورسېدې.
د يادو سياليو پايلوبه د ختيځ ځوانانو او گېنگ سټار لوبډلو ترمنځ ترسره شوه، ختيځ ځوانانو لوبډلې د لوبې پچې په گټلو سره په ټاکلو لسو اورونو سيالې لوبډلې ته د ۱۴۲ منډو هدف کېښود، گېنگ سټار لوبډلې ياد هدف ترلاسه نه کړ او د ۲۷ منډو په توپير يې ماته ومنله.
د يادونې وړ ده، چې د دغو سياليو په پای اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
