ننګرهار کې د ۶۰ ورزشکارانو ترمنځ د ووشو سيالۍ ترسره شوې
د ننګرهار ولایت د بدني روزنې او ورزش ریاست اړوند د ووشو ملي فدراسيون د استازولۍ له لوري د ياد ولايت د شپږمې ناحیې په ورزشي جمنازیوم کې له مرکز او ولسوالیو څخه د لس کلبونو ۶۰ ورزشکارانو ترمنځ د ووشو سیالۍ ترسره شوې.
دغه سيالۍ، چې د نويو ځوانانو، ځوانانو او د مشرانو ورزشکارانو په عمري کټګوريو ترسره شوې، په پايله کې مرتضی لومړی، هارون دويم او سبحان الله بيا درېيم مقام ترلاسه کړ.
د يادو سياليو موخه ورزش ته د ځوانانو هڅول او يووالی رامنځته کول و، چې يوه ورځ يې دوام وکړ.
د سياليو په پای کې غوره ورزشکارانو ته مډالونه او ستاينليکونه ورکړل شول.
