ننګرهار؛ چپرهار ولسوالۍ کې د ١٤ ښوونځیو ترمنځ د ټېپ بال کرېکټ سیالۍ پیل شوې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په چپرهار ولسوالۍ کې د ١٤ ښوونځيو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د چپرهار او ماڼۍ لېسو ترمنځ ترسره شوه. د لوبې پچه چپرهار لېسې لوبډلې وګټله او لومړی یې توپ وهنه وکړه. چې په ټاکلو لسو اورونو کې یې د پنځو ویکټو په زیان خپلې سیالې لوبډلې ته د ١٤٨ منډو هدف وټاکه. ماڼو لېسې لوبډلې د هدف په تعقیب کې د پنځو ویکټو په زیان ١٤٣ منډې وکړې او د پنځو منډو په توپیر یې لوبه وبایلله.
دا سیالۍ د زده کوونکو د فکري ودې په موخه پیل شوي دي، چې ٢٠ ورځې به دوام وکړي.
