ننګرهار؛ په شینوارو ولسوالۍ کې له نشه یي موادو سره د مبارزې په نوم د ټېپ بال کرکټ سیالۍ پیل شوې
د ننګرهار ولایت د بدني روزنې او ورزش ریاست په لارښوونه د شینوارو ولسوالۍ په ۲۹مه ویاله کې د نشه یي موادو سره د مبارزې په نوم د ۲۵ لوبډلو ترمنځ د ټېپ بال کرکټ سیالۍ پیل شوې.
د دغو سیالیو د پیل لوبه د شینوارو ځوانانو او شاهین سټار لوبډلو ترمنځ ترسره شوه، لومړی توپوهنه شینوارو ځوانانو لوبډلې ترسره کړه او سیالې لوبډلې ته یې په ټاکلو لسو اورونو کې د شپږو لوبغاړو په زیان ۱۹۸ منډې هدف کېښود، د لوبې په دویمه پاڼۍ کې شاهین سټار لوبډلې د اوو لوبغاړو په زیان ۱۳۵ منډې جوړې کړې او په ۶۳ منډو یې سیالې لوبډلې ته ماتې ومنله.
هېره دې نه وي چې د دغو سیالیو د پیل په مراسمو کې د یاد ولایت ورزشي مسوولینو، قومي مشرانو، ورزشکارانو او د ورزش ګڼو مینوالو ګډون کړی و او یادې سیالۍ به ۴۰ ورځې دوام وکړي.
