ننګرهار؛ په شینوارو ولسوالۍ کې د کرکټ ټېپ بال سیالۍ د ۲۹مې سوپر لوبډلې په اتلولۍ پای ته ورسېدې
د ننګرهار ولایت د بدني روزنې او ورزش ریاست په مرسته د کرکټ ټېپ بال فدراسیون او د شینوارو شپږ ګونو ولسوالیو د ورزشي مدیریت له لوري له نظام څخه د ملاتړ او له نشه یي توکو سره د مبارزې په نوم د ۱۴ لوبډلو ترمنځ د کرکټ ټېپ بال سیالۍ د ۲۹مې سوپر لوبډلې په ګټه پای ته ورسېدې.
د دغو سیالیو پایلوبه د شینوارو ځوانانو او ۲۹مې سوپر لوبډلو ترمنځ وشوه، چې شینوارو ځوانانو د لوبې پچه وګټله او لومړی یې توپوهنه وکړه او په ټاکلو ۱۰ اورونو کې یې د ۸ ویکټو په زیان مقابلې لوبډلې ته د ۱۲۸ منډو هدف ورکړ.
په مقابل کې ۲۹مې سوپر لوبډلې په لومړي پړاو کې لوبه مساوي کړه او لوبه دویم پړاو سوپر اور ته لاړه، ۲۹مې سوپر لوبډلې په سوپر اور کې ۱۹منډې وکړې، چې شنیوارو ځوانانو لوبډلې په سوپر اور کې ورکړل شوی هدف پوره نه کړ او لوبه یې بایلوده.
دغو سیالیو، چې ۱۵ ورځې یې دوام وکړ، په پای کې یې ګټونکې لوبډلې ته لومړی درجه کپ ورکړل شو.
