ننګرهار؛ په شينوارو ولسوالۍ د ۲۴ لوبډلو ترمنځ د ټېپ بال کرېکټ سيالۍ پای ته ورسېدې
د ننګرهار ولايت د بدني روزنې او ورزش رياست اړوند د ټېب بال کرېکټ فدراسیون د استازولۍ له لوري د ياد ولايت د شينوارو ولسوالۍد ګلاهي اوږدې غونډۍ په لوبغالي کې د ۲۴ لوبډلو تر منځ ټېپ بال کرېکټ سيالۍ د شينوارو ځوانانو لوبډلې په اتلولۍ پای ته ورسیدې.
د دغو سياليو پايلوبه د شينوارو ځوانانو او ګلاهي ارباپانو لوبډلو ترمنځ ترسره شوه، د شينوارو ځوانانو لوبډلې د پچې په ګټلو سره د توپ وهنې پرېکړه وکړه، چې په ټاکلو لسو اورونو کې د اتو لوبغاړو په سوځېدو سره مقابلې لوبډلې ته د ۱۴۱ منډو هدف وټاکه. په ځواب کې د ګلاهي ارباپانو لوبډلې د ټولو لوبغاړو په سوځېدو سره ۱۳۰ منډې جوړې کړې او لوبه يې د ۱۱ منډو په توپير سره وبايلله.
د يادو سياليو موخه د ځوانانو ترمنځ يووالي او له نطام څخه ملاټر و، چې ۲۵ ورځې يې دوام وکړ او په پای کې ګټونکي لوبډلې ته يو عراده بايسکل ورکړل شو.
