ننګرهار؛ په بټي کوټ ولسوالۍ کې د شپږو لوبډلو ترمنځ د ټېپ بال کرېکټ سيالۍ پای ته ورسېدې
د ننګرهار ولايت د بدني روزنې او ورزش رياست اړوند د ټېب بال کرېکټ فدراسيون د استازولۍ له لوري د ياد ولايت په بټي کوټ ولسوالۍ کې د شپږو لوبډلو ترمنځ د ټېپ بال کرېکټ سيالۍ د فريد کلب لوبډلې په اتلولۍ سره پای ته ورسېدې.
د دغو سياليو پايلوبه د قدرت الکوزي او فريد کلب لوبډلو ترمنځ ترسره شوه، د قدرت الکوزي لوبډلې د پچې په ګټلو سره د توپ وهنې پرېکړه وکړه ، چې په ټاکلو لسو اورونو کې د اووه لوبغاړو په سوځېدو سره مقابلې لوبډلې ته د ۱۱۲ منډو هدف وټاکه. په ځواب کې د فريد کلب لوبډلې ټاکل شوی هدف د لوبې په وروستي اور کې د اتو لوبغاړو په سوځېدو سره پوره کړ او لوبه يې د دوو ويکټو په توپير سره وګټله.
د يادو سياليو موخه ورزش ته د ځوانانو هڅول و، چې ۱۰ ورځې يې دوام وکړ.
