ننګرهار؛ په بهسود ولسوالۍ کې دودیزې سیالۍ تر سره شوې
د ننګرهار ولایت د سیمه ییزو او دودیزو لوبو د ودې، بیا ژوندي کولو ، پراختیا او احصایې راټولولو په موخه په بهسود ولسوالۍ کې محلي لوبې ترسره شوې.
د یادو لوبو پر مهال د بدني روزنې او سپورټ عمومي ریاست اړوند پلاوي، چې مشري یې د دې ریاست حقوقي سلاکار سید رسول افغاني کوله او په جوړښت کې يې جان علم حسني د ستونزو د هواري کمیسیون غړي، وحیدالله سایل د مشورتي بورډ غړي، فاروق الماس د حقوقي کمیسیون غړي، د ننګرهار ولایت د بدني روزنې او ورزش ریاست د ورزشي چارو امر ډاکټر منیر الدین خالد او یو شمېر نورو مسؤلینو شتون درلود.
په یادو سیالیو کې کلک ډنډه، د چپلک ویشتلو لوبه، تیږه اچول او د غیږنیونې سیالۍ تر سره شوې ، چې د لوبغاړو له لوري د یادو سیالیو اړوند معلومات هم وړاندې شول او د هرې لوبې طریقه، د لوبغاړو شمېر او نور جزیات تشریح شول.
د یادونې وړ ده، چې د یادو سیالیو ګټونکو لوبغاړو ته د عمومي ریاست د پلاوي له لوري یوه جوړه بوټان او نعدې ډالۍ ورکړل شوې او یاد لوبغاړي یې وهڅول؛ ترڅو خپلو دودیزو لوبو ته پاملرنه وکړي او وده ورکړي.
