ننګرهار؛ مومند درې ولسوالۍ کې د ۸۶ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په مومند درې ولسوالۍ کې د ۸۶ لوبډلو ترمنځ د ټېپ بال کرېکټ سیالۍ د نور محمد سټارز لوبډلې په اتلولي پای ته ورسېدې.
د یادو سیالیو پایلوبه د نور محمد سټارز او ینګ شینواري لوبډلو ترمنځ ترسره شوه. د لوبې پچه ینګ شینواري لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د اتو ویکټو په زیان خپلې سیالې لوبډلې ته د ۱۳۲ منډو هدف وټاکه. نور محمد سټارز لوبډلې ټاکلی هدف د درېیوو ویکټو په زیان د لوبې په اووم اور کې ترلاسه کړ او د اوو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې یوه نیمه میاشت یې دوام وکړ.
